في ملف كل استاذ نبذة عن اهتماماته، وشهاداته، وفيديو قصير يتكلم فيه. 

اختاروا الشخص اللي ممكن يفيدكم، اذا تحتاجون شخص يشرح قواعد اختاروا اللي متخصص فيها، اذا حابين تتكلمون مثلي بس اختاروا اللي اهتماماته مثل اهتماماتكم عشان تعرفون تفتحون مواضيع معه، اذا عندكم اختبار ممكن تختارون اللي يدرس هالنوع من الاختبارات وهكذا، مقطع الفيديو اللي بملفه راح يفيدكم في معرفة اذا لهجته ونطقه واضحة او لا، بعضهم يتكلم بسرعة ما يصلح للمبتدئين.

وممكن تجدولون جلساتكم مع معلمكم المفضل اذا نزلتوا لاخر ملفه الشخصي تلقون مواعيده، اختاروا اليوم والموعد المناسب لكم.

لازم تتأكدون ان النت كويس قبل الجلسة عشان ما يروح الموعد عليكم *صارت معي وعلى ما ضبّطت النت اخذت الاستاذة طالب ثاني مع ان موعدي ما خلص لسا للاسف* الموعد تقدرون تلغونه او تأجلونه قبل ست ساعات.

من الاشياء المهمة بعد اذا كنتوا ما تسمعون الصوت رغم ان النت قوي فهذا معناه ان النت عند المعلم مو كويس لا تضيعون الوقت واقطعوا الاتصال عشان ما تخسرون دقايق، واعتذروا بالرسايل.

بعض الاساتذة ما يلتزمون بالموعد للاسف *هالشي صارلي بعد، بس ما راحت دقايقي الحمدلله*حاولوا يكون الحجز قبل 2 الليل بتوقيت السعودية عشان اذا ما حضر الاستاذ يمديكم تدورون استاذ ثاني وما يروح اليوم عليكم.

يُفضل اذا ارتحتوا مع استاذ تحجزون معه عشان ما تضيع دقايقكم على التعرف والسؤال، ممكن بعد تستخدمون من المناهج اللي موفرتها كامبلي وتتواصلون مع استاذكم عبر الرسايل الخاصة وتطلبون منه تدرسون هالدرس عشان ما تضيعون وقت.

اليوم في كامبلي يبدأ الساعة 3 الفجر، وأما الاسبوع يبدأ من الاثنين الساعة 3 الفجر.

إذا بديتوا تستهلكون الدقايق كاملوها لانها ما راح تتراكم لكم لليوم اللي بعده، راح تروح بمجرد يبدأ اليوم الجديد.

اذا ما تقدرون تدخلون كامبلي لفترة ممكن تجمدون الحساب وهنا الطريقة.

للبنات تقدرون تختارون أستاذات وممكن بعد تقفلون الكاميرا *انا بالنسبة لي ارتاح اكثر بتقفيل الكاميرا* في مره علق التطبيق وما صار يطلع صورة المعلم ولما دخلت المحادثات المحفوظة صارت الكاميرا مفتوحة بس الحمدلله كانت موجهة للجدار لان لا تعليق على شكلي وانا متحمسة 🙈 

عمومًا المحادثات ما تنحفظ الا لكم وما راح يشاركونها مع احد.

زي ما قلت لكم ان الجلسات تنحفظ عندكم فتقدرون تراجعون أخطائكم، ومن الاشياء الحلوة بكامبلي ان المفردات الغريبة عليكم يكتبونها لكم المعلمين اذا ما فهمتوها وتترجم تلقائيًا، فعشان ترجعون تحفظونها وتستخدمونها راح تكون هي ايضًا محفوظة مع المحادثة.

تجربتي:

كانت المدة قصيرة زي ما قلت قبل، أحس اني احتاج مدة أطول، وكنت المفروض ألتزم مع أستاذة معينة، بس انا كنت اتنقل بين الناس كذا اجرب وأدور المناسب👀، لما لقيت الاستاذة اللي جد كويسة بالنسبة لي كانت باخر فترة لي بكامبلي، ولقيتها صدفة بعد، كانت باقية لي دقيقة وهي بعد باقي لها دقيقة على مكالمتها الجاية، فكلمتها وطلعت مدرسة من قبل بجامعتي وحسيت اني بعرف اسولف معها وفيه اشياء مشتركة يعني، وبعد هالدقيقة حجزت معها.
أحس التجربة كانت ممتعة وأكيد بكررها.
من الاشياء اللي تشكر لكامبلي خدمة العملاء عندهم، كل ما كلمتهم كانوا يعطوني الاجابة كاملة، غير الدقايق المجانية اذا جاوبت على استبياناتهم 😍😍، تابعوهم بتويتر ترا يعطون كوبونات دقايق مجانية💃.

الشهادة:

كامبلي يقدمون شهادة بعد انجاز 10 ساعات تعليمية في كامبلي، ما ادري اذا معتمدة او لا، لاني ما اخذتها لسا، بس يكفي انها تعطي شعور بالانجاز.