السلام عليكم ورحمة الله وبركاته
مرحبا | كيفكم

اليوم بسوي لكم طريقة نقل الصور للخشب، نقدر نستخدمها في كذا شي ممكن نسوي بهالطريقة لوحة او قواعد للاكواب او طاولات او حتى فواصل للكتب بالاعواد الخشبية زي اللي بالايسكريم، وتصلح كهدية بسيطة وعليها صورة او عبارة يحبها الشخص 🙊

نحتاج:

لوح خشب

صمغ ديكوباج

فرشة للصمغ 

صورة عشان ننقلها للخشب

زيت اطفال

الطريقة:

انا استخدمت صمغ ديكوباج للاقمشة من دايسو وهذا شكله

ندهن لوح الخشب بالصمغ ونحرص نغطي كل مكان وبعدها نحط الصورة على اللوحة، اذا في الصورة كلام نعكس الصورة بالوورد قبل الطباعة، نحط الصورة على الصمغ مباشرة وظهرها يكون في جهتنا ونتاكد ان ما فيها هواء من جوا ولازقة كويس عشان ما يصير فيه فراغات زي اللي صار معي بالنهاية 🌚 

نخليها تنشف يوم كامل بعدها نقشرها بموية ونفركها راح تكون الوانها باهته فعشان كذا راح ندهنها بزيت اطفال او اي زيت خفيف زيه.

ملاحظة: ما جربت الطباعة فما ادري هل ينفع بالطابعة العادية او لا، جربت صورتين وحدة من كتالوج سيارات اوراقه قوية وحبره ما يسيح بالموية وهي الصورة اللي سويتها "ابو الهول"، وهنا التجربة الثانية كانت من كتالوج ايكيا وساحت الوانها وخربت الدنيا 🤦🏽‍♀️💔

النتيجة: 

كان فيها هواء ما لزقتها زين بس حابه النتيجة احسها صايرة شوي كانها تراثية كذا *محد يسلك لنفسه* 😂😂💔

السلام عليكم ورحمة الله وبركاته 

مرحبا | كيفكم

اليوم بشارك معكم طريقة بطاطس بالمايكرويف لذيذذة شوي عليها 🤤💛💛 .. الحلو فيها ان ١٠ دقايق وهي جاهزة اذا مو اقل اذا البطاطس صغير او مقطع .. وتصلح لليل الشتاء، يالله نبدأ 🤭

ــــــــــــــــــــ 🍽 ــــــــــــــــــــ

المقادير:

بطاطس 

زيت زيتون

ثوم معجون

بصل مجفف

بهارات (نعناع مجفف، فلفل، ببريكا، سماق، او اي بهارات تحبونها)

الطبقة الثانية (الصوص):

مزاريلا

٢ ملعقة صغيرة جبن سايل 

صوص ثوم

صوص حمص

كاتشب

شوي عصير ليمون

زيتون

الطريقة:

نقشر البطاطس ونغسلها، وبعدها نخلط في صحن (زيت زيتون، ثوم معجون، بصل مجفف، البهارات) وفي صحن ثاني نخلط (مزاريلا، جبن سايل، صوص ثوم، صوص حمص، كاتشب، عصير ليمون، زيتون) *ممكن تحطون اي شي تحبونه من الصوصات او تستغنون عنه وتكتفون بالمزاريلا اذا ما تحبون الصوص الابيض*

اول شي ندهن البطاطس بخلطة الزيت زيتون *ما انصح تحطون زيت الطبخ احسه بيصير ثقيل ومو حلو طعمه* بعدها نحطه بالمايكرويف لما يقارب العشر دقايق ونتاكد منه كل شوي اذا خلص او لا، تقدرون تأكلونه الحين اذا ما ودكم تحطون صوص، او بتضيفونه لطبق ثاني.

ولمحبين الصوص حطوا الصوص ودخلوه المايكرويف مره ثانية عشر ثواني تقريبًا عشان تذوب الموزاريلا 😋

وبس لهنا خلصت وجبتنا اللذيذة 😋👌🏼

ــــــــــــــــــــ 🍽 ــــــــــــــــــــ

السلام عليكم ورحمة الله وبركاته 

مرحبا | كيفكم

هذي اول مره اكتب هالنوع من التدوينات وان شاء الله تعجبكم وتحبونها، احب دائمًا اقرأ التدوينات اللي الشخص يجمع فيها كذا فكرة، وهذي التدوينة او هالسلسلة بتكون من هالنوع عشان كذا راح يكون اسمها عشوائيات 🙏

ــــــــــــــــــــ 🔎 ــــــــــــــــــــ

مصل الحقيقة:

قد فكرتوا ان فيه حبوب او حتى ابره تعطونها الشخص ويقول الحقيقة وما يكذب ابد 🤔 اول ما سمعت عن هالفكرة كانت بمسلسل، دكتور نفسي يعطي سجين هالابرة ويعترف باللي صار، ولما بحثت عن حقيقة هالابرة طلع مصل الحقيقة موجود فعلًا مو خيال يعني 😱.

الاغلب يعرف جهاز الكذب ويعرف انه مو دائمًا صادق كون الشخص ممكن يتحكم بانفعالاته ودقات قلبه وما ينكشف، وهذا الفرق بينه وبين مصل الحقيقة، المصل او بنتوثال الصوديوم أو ثيوبنتال الصوديوم هو دواء للتخدير ودواء نفسي يجعل الانسان يتوقف عن الكذب وينطق بالحقيقة كاملة وبدون اي ضغوط على هالشخص بحيث يجعل الشخص بين اليقظة والهذيان ويفقده قدرته على التأليف والابتكار بالتالي ما يقدر يكذب.

فيه تجارب ثانية قالت ان المصل مو فعال لانه ممكن يجعل الانسان في حالة لا واعية فيصير يقول اللي يبون يسمعونه الناس او اللي يتمنى حدوثه مو الحقيقة، وقد يعترف بأشياء ما سواها، احيانا الشخص ممكن يكون فاقد الذاكرة او فيه علة نفسية تأثر على الحقيقة مما يجعلها ناقصة او حتى مكذوبة لكنه يعتبره حقيقة في حياته، لهذا يعتبر هذا المصل غير قانوني خاصة في الاستجواب، ايضًا هالمصل ممكن ينتهك خصوصية الناس كونه رح يفشي اسرار مالها علاقة بهالاستجواب.

يعني وصلنا ان المصل تقريبًا مفيد اذا كان الشخص  في حالة نفسية وعقلية كاملة.

ــــــــــــــــــــ 🔎 ــــــــــــــــــــ

المكعب الاكثر مبيعًا:

اللعبة المكعبة ذات الستة اوجه الأكثر شهرة ومبيعًا في العالم، اخترعها النحات المجري إرنو روبيك عام ١٩٧٤ والهدف الاساسي ما كان لعبه ابدًا، بل كان لتوضيح الاشكال ثلاثية الابعاد لطلابه وصُنع اداة ممكن يتم تحريك جزء منها بدون انهيارها كليًا، وفي محاولته الاولى لحل المكعب احتاج شهر كامل!!

كان اسم هذا المكعب هو المكعب السحري وتم تغييره لمكعب روبيك، سجله كبراءة اختراع وبعدها بفترة اشترته شركة العاب، وتم بيع أكثر من 350 مليون مكعب روبيك حول العالم حتى يناير 2009، وكمل المكعب ٤٤ سنة الى الان. 

في الثمانينات المكعب كان شهير لدرجة ان احد الاحصائيات قالت ان واحد من كل خمس اشخاص في العالم لعبوا به!! من شدة شهرته استعملوه في الاعلانات والاغاني، وتم صنع اشكال واحجام مختلفة من المكعب منها: العملاق والصغير جدًا والماسي.

الشهرة وصلت لدرجة انه تم تنظيم مسابقات لحل المكعب، اهمها وأولها بطولة في ميونيخ يوم 13 مارس 1981 تم تنظيمها من قبل غينس للارقام القياسية.

اغرب تلك المسابقات هي: حل المكعب معصوب العينين، حله تحت الماء في نفس واحد، حله بيد واحدة، حله بالقدم.

وصار الناس يتنافسون على كسر الرقم القياسي، للي يسألون عن الرقم الحالي هو ٤.٩ ثانية !!

ما وقفت شهرة المكعب هنا بحيث تم إنشاء موقع لحل المكعب بحيث تحط الاوجه والالوان للمكعب اللي تبي تحله ويعطيك الخطوات لحلها، الموقع هنا:

موقع لحل مكعب روبيك

 ــــــــــــــــــــ 🔎 ــــــــــــــــــــ

وبس لهنا وصلنا لنهاية التدوينة اتمنى انها اعجبتكم وكانت خفيفة عليكم واستفدتوا من هالمعلومات