سنة جديدة | منظم وبلانر سنة 2021م
6:02:00 مبسم الله الرحمن الرحيم
سلام | كيفكم
زمان عن المدونة أحس اشتقت لها بس مع هالجو الزين لا بد من العودة 😻
تدوينتنا اليوم عن بلانر سنة 2021
اخترتوا أجندتكم؟؟ باقي شهر و10 أيام تقريبًا على نهاية السنة فاذا ما اخترتوا تعالوا اساعدكم.
طبعًا كل سنة متعودين بالمدونة نختار بلانر او نسوي مع بعض وهالسنة اخترت بلانر خطّة وهو بلانر غير مؤرخ تقدرون تبدؤون من أي شهر تحبونه فما تضيع عليكم أوراق لانكم تقدرون تستخدمونها السنة الجاية + مضاف له تقويم سنة 2021 مع اللي يقابلها بالهجري وهالشي يساعدكم وقت ما تحددون مهامكم أو وقت تكتبون التواريخ في البلانر.
طبعًا فيه تفاصيل كثيرة بالمنظم فـ يلهه نبدأ التدوينة:
______________ 💖 ______________
شعار منظم خطة: "لان الحلم يحتاج لخطّة لانجازه."
يجي المنظم بمقاس A5 يعني (14.8*21 سم) وبسلك حلزوني، بأول صفحة فيه مكان لكتابة معلوماتك عشان اذا ضاع اللي يلقاه يقدر يرجعه لك.
تقويم عام 2021م وواللي يوافقها للعام الهجري، الحلو بهالصفحة ان فيه مجال تحت كل شهر أكتب فيه الاحداث أو المناسبات وهالشي مرره احبه بتقويم السنة تنرفزني الشهور اللي لازقة ببعضها وما اقدر احدد عليها.
ما كفتكم المساحة اللي قبل؟ هنا مخطط السنة، بمساحة فارغة لكل شهر، تكتب فيه احداث ومناسبات كل شهر بطريقة اوضح، مهمه بالنسبة لي عشان المواعيد مثل مواعيد الاسنان والاختبارات واي شي فيه متابعة بس بشكل عام.
قائمة المشاريع اللي تبون تنجزونها بهالسنة، مثل: الكتب، والأماكن اللي بتزورونها، أو أي شي ثاني. بالنسبة لي باستخدمه في تتبع الكتب اللي اقراها 😍😍.
طبعًا ما يصير بلانر مثالي بدون مساحة فارغة للكتابة وتدوين الافكار والفضفضة، فيه ثلاث أوجه مسطره لكتابة الأفكار.
بعدها يجي دور الأشهر ومحتوياتها، كل شهر يحتوي على:
يجي كل شهر بفاصل مختلف وفيه مساحة لاقتباس الشهر، حبيت ان الاقتباس انا اللي اختاره مو مكتوب لان احيانا الاقتباسات اللي مكتوبة بالبلانرات ما تكون تمثلني لهالشهر او ما احبها، غير ان فيه ناس تحب تكتب من كتاباتها او ترسم بهالمساحة او تعبر بالفن اللي يعجبها، اعتبره مساحة فنية.
وجهين للتخطيط الشهري بدون تواريخ لاستخدامها بأي وقت، وممكن تستخدمون استكرات الارقام او الاختام للتواريخ😻، غير ان فيه مساحة جانبية لكتابة الاولويات، او المهام المؤجلة او اي شي اخر.
صفحات المخطط شهري فيه مساحة لكتابة التاريخ بالاضافة لمساحة للمهام، تقدر تستخدم مساحة المهام بالشكل اللي يناسبك سواء تكتب فيها المهام المهمة لهالاسبوع او تتابع فيها تقدمك بمهمة معينة او اي شي ثاني، طبعا المستطيلات للاسبوع بالعرض مو بالطول وهذا الشي افضل بالنسبة لي عشان اذا فيه تفاصيل كثيرة اكتبها جنب المهمة مو تحت، لان اذا كتبتها تحت بتصير كانها مهمة ثانية وبحس ان عندي مهام كثير 😉، جربوا هالخدعة تفيد والله 😂😂.
أشوفكم وانتم كل سنة تحطون هدف تضبيط اكلكم وجسمكم 👀 هنا مخطط لوجبات الشهر وتحته قائمه للتسوق عشان ما ناخذ اكثر من حاجتنا بالاكل ويخرب او نضطر ناكل اكثر من حاجتنا قبل يخرب ونخرب الخطة فهالجدول بيحفظ وقتك بالتفكير وفلوسك ووزنك 👌.
بالجهة الثانية: جدول للشهر لكتابة التمارين الرياضية ومساحة لتتبع المقاسات.
صفحة لتتبع العادات على مدار الاسابيع بالاضافة ان فيه مساحة فاضية تحت، ويقابلها صفحة جدول لتتبع الصرف الشهري، تقدرون تراقبون وين ضاع المصروف او الراتب هنا.
بالاضافة ان كل نهاية شهر فيها صفحة لكتابة الافكار والشخبطة.
وبس لهنا انتهينا من تفاصيل المنظم تلقونه في:
متجر خطّة: هنا
حساب الانستقرام: هنا
تويتر: هنا
______________ 💖 ______________
وبس لهنا وصلنا لنهاية التدوينة اتمنى انها اعجبتكم وكانت خفيفة عليكم.
ولا تنسون تتابعوني بالانستقرام وتويتر على: random_fofz 🌿
0 التعليقات