السلام عليكم ورحمة الله وبركاته 

مرحبا | كيفكم

اليوم بشارك معكم طريقة بطاطس بالمايكرويف لذيذذة شوي عليها 🤤💛💛 .. الحلو فيها ان ١٠ دقايق وهي جاهزة اذا مو اقل اذا البطاطس صغير او مقطع .. وتصلح لليل الشتاء، يالله نبدأ 🤭

ــــــــــــــــــــ 🍽 ــــــــــــــــــــ

المقادير:

بطاطس 

زيت زيتون

ثوم معجون

بصل مجفف

بهارات (نعناع مجفف، فلفل، ببريكا، سماق، او اي بهارات تحبونها)

الطبقة الثانية (الصوص):

مزاريلا

٢ ملعقة صغيرة جبن سايل 

صوص ثوم

صوص حمص

كاتشب

شوي عصير ليمون

زيتون

الطريقة:

نقشر البطاطس ونغسلها، وبعدها نخلط في صحن (زيت زيتون، ثوم معجون، بصل مجفف، البهارات) وفي صحن ثاني نخلط (مزاريلا، جبن سايل، صوص ثوم، صوص حمص، كاتشب، عصير ليمون، زيتون) *ممكن تحطون اي شي تحبونه من الصوصات او تستغنون عنه وتكتفون بالمزاريلا اذا ما تحبون الصوص الابيض*

اول شي ندهن البطاطس بخلطة الزيت زيتون *ما انصح تحطون زيت الطبخ احسه بيصير ثقيل ومو حلو طعمه* بعدها نحطه بالمايكرويف لما يقارب العشر دقايق ونتاكد منه كل شوي اذا خلص او لا، تقدرون تأكلونه الحين اذا ما ودكم تحطون صوص، او بتضيفونه لطبق ثاني.

ولمحبين الصوص حطوا الصوص ودخلوه المايكرويف مره ثانية عشر ثواني تقريبًا عشان تذوب الموزاريلا 😋

وبس لهنا خلصت وجبتنا اللذيذة 😋👌🏼

ــــــــــــــــــــ 🍽 ــــــــــــــــــــ