حول صورك من رقمية لورقية | طابعة كانون سيلفي cp1300

5:30:00 م

السلام عليكم ورحمة الله وبركاته

مرحبا | كيفكم

canon selphy cp1300

بتكلم بهالتدوينة عن تجربتي مع طابعة كانون سيلفي cp1300 بما اني احب الصور الورقية جدًا لكن اغلب تصويرنا الحين بالجوالات، فقررت اشتريها عشان احتفظ بالصور ورقية عندي، كان عندي كذا خيار اشتري منها اللي هي: الكاميرا الفورية، وطابعة hp بس مشكلة الكاميرا ان الصورة يمكن ما تكون حلوة فتروح الورقة عليك، وطابعة hp حجم صورها صغير فما حبيتها، اخترت كانون كوني قد جربت جودتها عند شخص اخر وبما انها عاجبتني جدًا قررت اشتريها، وان شاء الله تكون هالمراجعة كافية ووافية.

يلهه نبدأ:
______________ 💖 ______________

مواصفات الطابعة كالآتي:

اسم الطابعة: Canon selphy CP1300
السعر: ما يقارب الـ 400 ريال لـ 500 ريال، يختلف باختلاف البائع.
الألوان المتوفره: اسود | ابيض | وردي.
بطاقات الذاكرة المدعومة: SD / SDHC / SDXC، بالاضافة لدعمها للـ USB، ومن الممكن بعد الطباعة عبر: الواي فاي أو الاتصال بها والطباعة مباشرة من الجوال او اللابتوب.
حجم الورقة: 148 مم × 100 مم، واللي هي اكبر شي.
الطابعة تعمل على كهرباء: 100v / 240v.

محتويات صندوق الطابعة:

الطابعة | محول الكهرباء | سلك الكهرباء | درج الورق | بالاضافة للكتالوجات.
ويجي معها مجانا: 54 ورقة بالاضافة لحبر يكفيها.

طباعة الصورة:


لازم يكون ورا الطابعة مساحة كبيرة نوعًا ما، عشان ما تخرب الورقة، كون الورقة تطلع من ورا بعد اثناء الطباعة.
الورق دخلوا بكج واحد بس، اي ١٨ ورقة عشان ما يصير زحمة وتنحشر الاوراق وتتلف، دخلوها والجهة اللي تلمع على فوق ولا تلمسون الجهة اللي تلمع،عشان ما تخرب. ولا تثنون الورق او تفصلون الجزء المخرم قبل الطباعة.
بعد اعطاء الطابعة الامر بالطباعة، راح تاخذ وقت لين تصير ملونة لانها كل شوي تطبع أحد الالوان وهالشئ تلقائي وبدون أي تدخل.
أولًا: اللون الاصفر.
ثانياً: اللون الاحمر.
ثالثًا: اللون الازرق.
الاخيرة: طبقة حماية ويقال انها تحمي الصورة 100 سنة.

شرح الخيارات:


الخيارات من اليسار لليمين من فوق لتحت:
1- لتحديد الصور وعدد النسخ (اذا مو من الجوال).
2- لطباعة بشكل اخر او طباعة صور تم طباعتها سابقًا.
3- اطبع صورك معًا باحجام تحدد تلقائيا.
4- لطباعة صور الهوية والجوزات الخ..
5- لاعداد الوايفاي.
6- لاعداد عمليات الطباعة.

مميزات الطابعة:

بالنسبة لاوراق الطابعة تجي مع حبر يكفيها لا يزيد ولا ينقص، 108 ورقة مع حبرها يعني ما يحتاج تشتري حبر لحاله، سعره يتراوح بين 100 و150 ريال. اما الصور تقدر تطبع كذا مقاس زي مقاس الصور الشخصية، بالنسبة لي جربت العادية بس.
الحلو ان الطابعة مخصصه للصور، يعني جودة الطباعة جدًا عالية، الوانها حلوة ومو غامقة او فاتحة اكثر من اللازم، يقال انها ما تتلف بالموية وتحافظ على الوانها لما يقارب 100 سنة، بالنسبة لي احطها بالالبوم اول ما اطبعها عشان احافظ عليها من السوائل.

النتيجة:


هنا الوان الصور بدون فلتر، بس للاسف كانت الاضاءة حولي مو مره عشان كذا طالعة غامقة، هالصور من الصور اللي بانستقرامي تقدرون تشوفونها هناك، جمعتها ببرنامج لتجميع الصور مو من نفس الطابعة وبعدها طبعتها.
شريتها من سوق.كوم.
الرابط: هنا

تقدرون تبحثون عن ارخص سعر يناسبكم من موقع برايسنا يعطيكم ارخص مكان يبيع السلعة اللي تبونها.
برايسنا: هنا

تطبيق للطابعة بالنسبة لي ما استخدمه اطبع مباشرة من الجوال، بس ممكن تحتاجونه.
التطبيق:

______________ 💖 ______________

وبس لهنا وصلنا لنهاية التدوينة اتمنى انها اعجبتكم وكانت خفيفة عليكم.

ولا تنسون تتابعوني بالانستقرام وتويتر على: random_fofz
وهنا كود السناب شات 🌿



You Might Also Like

0 التعليقات