اليوم راح اتكلم عن يوم في حياتي ضمن #تحدي_النافذة ما اعرف اكتب هالنوع من التدوينات بس خل نجرب 🙊 وهذي اول تدوينة راح تكون بهالتحدي 

٩:٤٥ ص 

صحيت اليوم بهالوقت بما اني غايبة عن الدوام، وسويت روتين الصباح غسيل وجه تنظيف اسنان والذي منُه << ليش تسوين التدوينة دام مالك خلق تكتبين 😂😂

١٠:٠٠ ص 

بديت اسوي قهوتي واجهز فطوري، طبعا القهوة سويتها بكوب راح اسوي تدوينه عنه فكذا اضرب عصفورين بحجر احط الصورة بهالتدوينة وبذيك بعد، اوه صح وبحطها بتحدي الانستقرام يعني ثلاث عصافير بحجر 🌚😂😂 لا تنسوون تتابعوني هناك @random_fofz

طبعا هالكبسولات اسمها lungo من ماركة must هي الوحيدة اللي اشربها بدون حليب طعمها لذيذ 🙊

ترا ستيفا مو خيار صحي ولا شي بس عشانه يذوب بسرعه *الكسل مشكلة👀* والمشكلة انه يذوب بسرعة اذا حطيته قبل القهوة مو بعد فضطريت اجيب ملعقة واحركه 😂😂

بعدها سخنت ساندوتش من اللي سويته للانش بوكس للدوام بما اني سويت يوم الجمعة للاسبوع كامل تقريبًا وقعدت افطر وانا اشوف برنامج صباح السعودية، احب البرامج الصباحية جدًا ☹️💖💖 طبعا اشوف البرنامج وافطر واكتب هالجزء من التدوينة واصور واسولف بالواتساب << مواهب انا لعلمكم 😂😂

اوه صح تو تجيني الموافقة على الاجازة لليوم 💃🏼💃🏼💃🏼

١١:٠٠ ص

شحن جوالي ٣٪؜ بروح اشحنه وادور شي اسويه وارجع لكم *دفتر يوميات مو تدوينه 🌚* 

خليت جوالي يشحن ورحت اغسل ملابسي وازين البلانر وانا اشوف صباح الخير يا عرب، اقولكم عشق البرامج الصباحية 🤩🤩 

الفوضى اللذيذة 🤤، عاد من زمان عن تزيين البلانر وبعد دلعنا الدفتر الجديد 🙊

كيف وليدي الجديد، الدفاتر عششق خاصة اللي لها حلقات من جوا 😭😭

١٢:٠٠ م

بعد القهوة حان وقت التجهيز للمشوار #الجنادرية.

١٢:٣٠ م 

تجهزنا وخلصنا ومن قلب السيارة احدثكم *من اللي تحس انها مراسل حاليًا😂🎤*

صديق الرحلة الفاتن 🤤🌿

وصلنا وبدت الرحلة

٧:٣٨ م 

اوه بغيت انساكم 😂😂 بس قعدت اصفي الصور واشوف التقاطاتي المبدعة من الجنادرية اللي بحطها بهالتدوينه🙊 تعالوا خل اوريكم وش اشتريت من هناك 👏🏼👏🏼

اكسسوارات من القرية العالمية هناك، سلسال فضة واسواره برجي كل واحد بـ ٢٠ ريال، اسعارهم رخيصة مدري من البداية اسعارهم كذا ولا عشانها الايام الاخيرة 🤷🏽‍♀️

طبعًا ما نسينا نشتري حلوى بحرينية اكيد، اعشقها عشق🤤 وكيكة لوتس بعد ☹️💖💖

٨:٣٠ م

وقت القهوة مع كيكة اللوتس 🤤 ومناقشة الاحداث اللي دارت في الجنادرية 🧐 لازم نبدا ونختم اليوم بقهوة 😂😂

١٠:٣٠ م 

قبل ما اقولكم تصبحون على خير بما اني وراي دوام بكره، خل اوريكم كم خطوة مشيت اليوم 🙊 *للابد احب المشي الطويل*

وبس لهنا اقولكم تصبحون على خير ويارب التدوينة لطيفة وما اكون ثقيلة دم 🙈

لا تنسون تتابعوني بالسناب 🌿

فجأة في يوم يجيكم اتصال الصبح ويقول تقدرين تباشرين معنا يوم الاحد، هنا يصير مخك فوراً يفكر قبل حتى نهاية المكالمة: وش اخذ؟، وش ألبس؟، وش طبيعة الدوام؟، كيف اتعرف عليهم؟، ألخ...

وهالشي ينطبق على البدايات كلها: بداية جامعة، بداية عمل، بداية تدريب تعاوني، نقل لمدرسة جديدة ...

أول سؤال يخطر على بال البنات وش البس:

الملابس احرصي اول يوم تكونين رسمية بما ان الانطباع يؤخذ من اول نظرة، وفي الصورة حطيت بعض النماذج اللي احسها مناسبة، لين تتعرفين على الاشياء الممنوعة والمسموحة وطبيعة المكان اذا كان برد، حر، مشي كثير او مكتبي وهكذا ...

احرصي تلبسين شوز مريح وخاصة اذا الدوام ميداني ويحتاج وقفة ومشي، الشنطة ايضًا اذا ميداني خففيها كثر ما تقدرين عشان ما تكسر كتفك.

خذي بشنطتك نوتة وقلم: أكيد ما ينفع تروحين لدوام بدون هالاشياء حتى لو تحسين شغلك ما يحتاج، مجرد احتياط 💡مره كنت بالاحوال وفيه بنات يتدربون وكانت تقولهم جايين بدون دفتر بكره جيبوا دفتر تسجلون فيه 😔💔احسني انحرجت وانا مالي دخل.

بالنسبة للفطور: أكيد ما راح تقعدين بدون اكل طول اليوم، فاحتياط خذي قهوتك بكوب حافظ للحرارة واكل خفيف لانك ما تعرفين الظروف اللي هناك، ممكن ما يكون فيه مجال تشترين او هم نظامهم كل شخص يجيب اكله من البيت.

البعض ممكن اذا رفضت الاكل معهم ممكن يحس انك انطوائي اذا عزموك لبي العزيمة وغالبا جيبي فلوس عشان اذا بيطلبون ويفضل يكون معك فكة *صرف*.

بالشغل: لا تحاولين تسووين فاهمة بشغلة ما تعرفينها اسالي قبل عشان ما تخربين شغلهم *من قال نكبتهم وصارت ما تخليني اسوي هالشغلة ابد🌚*

احرصي توصلين قبل وقت الدوام بعشر دقايق واحسبي حساب زحمة الطريق :(
خذي اوراقك الرسمية للدوام وكل الاوراق اللي تحتاجينها، تأكدي بطاقة الاحوال تكون معك.

ادري الكل متحمس يوثق اول يوم دوام ويصور احداثه، بس ماله داعي في اول يوم لكم يحسونكم ما تتركون الجوال ابد ويأخذون فكرة انكم مهملين.

وبس هذي خلاصة تجربتي البسيطة في التدريب التعاوني وان شاء الله تستفيدون منها.

وبس لهنا انتهت تدوينتنا اتمنى انها فادتكم 🙏🏽✨
ولا تنسون تتابعوني بسناب:

بأمان الله 💫