9 نصائح للرحلات الطويلة
6:12:00 م
بسم الله الرحمن الرحيم
سلام |كيفكم
سلام |كيفكم
بهالتدوينة راح اشارك معكم نصائح للسفر وخاصة للرحلات الطويلة بالسيارة سواء النصائح اللي جربتها او اللي قريتها وحسيتها مفيدة.
يلهه نبدأ:
______________
______________
الشنطة المشتركة:
من النصائح اللي قريتها واعجبتني تخصيص شنطة وحدة للكل، بحيث يصير لكل واحد لبس فيها، هالحركة مفيدة مرره للي بيوقفون بمحطة بالنص بين مكان انطلاقهم ومكان وصولهم، فما يصير لما يوصلون ينزلون كل اغراضهم عشان يوم او يومين، خلاص ينزلون الشنطة المشتركة وتصير خفيفة ويتجنبون فوضى التنزيل والتحميل.
الاوراق الرسمية:
اعطوا هالمهمة لشخص واحد يكون مسؤول عنها عشان ما ينساها احد، او يعتمد انها في محفظته او شنطته وتكون مو موجودة، ويتأكد انها كلها مو منتهية او انها بتنتهي اثناء السفر.
المناديل المبللة:
المنقذ في السفر، تقدرون تستخدمونها لكل شي سواء لتنظيف شي مكبوب او مسح اليدين بعد الاكل، والخ...
كيس للقمامة:
تخصيص كيس لجمع للعلب الفارغة واكياس الاكل وتفريغها في كل محطة، خاصة للي عندهم اطفال عشان تظل السيارة نظيفة وما يحوسون السيارة.
عدسات لكاميرا الجوال:
لأن الذكريات اهم ما في السفر احس هالعدسات مهمة، موجودة في كل المواقع وبأسعار رخيصة، عدسة ماكرو، عدسة عين السمكة، عدسة اللقطات الواسعة.
للترفية:
احرصوا تحملون كتب الكترونية او مسموعة وبودكاست والعاب، خاصة ان النت ما يكون كويس بالطريق، او ممكن تصنفون الصور بالجوال، او حتى تنجزون المهام الغير مكتملة.
شحن الجوال:
وبما اننا تكلمنا عن الجوال فمن الاشياء المهمة هي شاحن السيارة، خاصة اذا ساعات الرحلة كثير، وما ننسى بعد القسّام او المحول لان الافياش مختلفة من مكان لمكان.
للنوم:
في شنطة او كيس صغير حطوا بطانية خفيفة ومخدة الرقبة لغفوات الطريق، لا تحطونها في الشنطة الكبيرة عشان توصلون لها بسهولة، وممكن بعد تحتاجون البطانية اذا مكيف السيارة بارد وفيه اشخاص اخرين يبونه وما تقدرون تطفونه.
غطاء المرحاض:
أهم شي بالنسبة لي حتى بالمشاوير العادية، الحمامات العامة مو بكل مكان نظيفة فهذا الحل للموضوع، احرصوا تأخذون النوع الورقي مو البلاستيكي لانه يتحلل بالموية.
____________________________
وبس لهنا وصلنا لنهاية التدوينة اتمنى انها اعجبتكم وكانت خفيفة عليكم.
ولا تنسون تتابعوني بالانستقرام وتويتر على: random_fofz
وهنا كود السناب شات 🌿
2 التعليقات
اعجبتني الشنطة المشتركة اعتقد انها حل مريح جدا، ماقد فكرت فيها عادة ننزل كل الاغراض وتصير حوسه
ردحذففعلا الفكرة مريحة جدًا خاصة لو كان عدد الافراد كثير.
حذف