بسم الله الرحمن الرحيم
سلام | كيفكم
من زمان عن التدوينات 😫💛💛 اليوم تدوينتنا عن اكثر شي تقريبًا تفاعلوا معه الناس بانستقرامي، اعمال الريزن، وهالمره بدون قوالب، بنصنع قوالبنا بنفسنا، بسوي معكم فواصل للكتب بالريزن.
يلهه نبدأ:
______________ 🔖 ______________
نحتاج:
* الريزن، انا شريته من جولي شيك تلقونه هنا.
* سطح بلاستيكي مثل غلاف ملازمة او غطاء حلويات، المهم يكون ثقيل.
* صمغ مسدس.
* اي قلم ترسمون فيه عالبلاستيك وتحددون شكل القالب.
* غطاء صغير عشان تستخدمونه كمقدار.
* عود خشبي او بلاستيكي.
* كوب بلاستيكي للخلط.
الطريقة:
القالب: اول شي نحدد شكل القالب بالقلم عالبلاستيك، وبعدها بدأ نرسم بالصمغ المسدس فوق التحديد لين نوصل للارتفاع اللي نبيه، انارسمت حوله ثلاث مرات تقريبًا لين صار ارتفاعه مناسب، حاولوا يكون مافيه فراغات بين الصمغ والبلاستيك عشان ما يتسرب الريزن.
لا تنسون تحطون القالب بعد كذا بصينية عشان تتاكدون انه ما يميل ويخرب وعشان اذا تسرب الريزن يكون بالصينية.
الريزن: اول شي انواع الريزن كثيرة فالخلط يكون على حسب النوع اللي عندكم اذا نسبته ١:١ فالخلط يكون اذا حطيتوا كمية مصلب تحطون نفسها ريزن، اونسبته ١:٣ بحيث كمية المصلب اللي تحطونها تحطون مثلها ثلاث مرات ريزن، والنوع الاخير هو النوع اللي عندي.
اول شي بالكوب احط غطاء من المصلب لان اذا حطيته بالاخير ممكن يكون في الغطاء بقايا من الريزن وتقل كمية المصلب ويصير لين *للاسف قد صارت لي* فنحرص ان المصلب يكون اول وبعدها ثلاث اغطية من الريزن واللون اذا نبي نلونها، نتأكد ان كمية اللون ما تكون كثيرة عشان ما يخرب الريزن ويصير لين. ونخلطها بشويش ليين نتأكد انها انمزجت كويس، بدون ما نطلع فقاعات بس لا تشيلون هم الفقاعات بنتخلص منها بالاخير.
صفوا الزينة اللي تبونها بالقالب، انا حطيت ورد وورق مجفف، وبالثاني حطيت ريش طبيعي من الحوش 😂😂، تقدرون تستخدمون اي شي كزينة، مثل: لولو، خرز، ورد مجفف، اكسسوار، اي شي يناسب ذوقكم، اهم شي ما يخرب بالموية اذا يخرب من الموية يعني بيخرب من الريزن.
بعدها صبوا الريزن بالقالب وحاولوا ان الاشياء ما تتحرك. وبعدها مروا بالولاعة على الفقاعات لين تتخلصون منها، غطوها عشان ما يطيح فيه شي، ولمدة ٣ ايام تقريبًا عشان تتاكدون انها تصلبت تمامًا.
تقدرون بعدها تطلعونها من القالب وتزيلون بقايا الصمغ منها.
تقدرون تشوفون الطريقة كاملة: هنا
النتيجة:
هذا الشكل النهائي: الصمغ ما يخلي الحواف ناعمة تمامًا، تقدرون تصنفرونها اذا بغيتوها انعم بس انا عاجبتني النتيجة كذا اكثر 😫💛💛
ملاحظة: تقدرون تشترون قوالب سيلكون جاهزة من جولي شيك هنا، فيه انواع كثيرة ثانية، اختاروا اللي يعجبكم، انا اخترت هذي وجتني معها 85 قطعة ما بين الوان وملاعق خلط ولمعة، حبيت القوالب مره بس حجمها صغير شوي، تصلح للاكسسوارات اكثر.
بعض الاعمال اللي سويتها من قبل بالريزن:
هذي من القوالب الجاهزة اللي شريتها ولونتها بنفس الالوان اللي جت معها، هالعمل الغلط الوحيد اللي فيه ان الخليط بعد ما جف ما تصلب صار لين :(
هذا الكوستر سويته بنفس الطريقة، بس بدال البلاستيك حطيت ورق زبدة، كان كويس بس مشكلته الصمغ ما ثبت عليه فصار يسرب من كل جهة وخرب نوعًا ما، لانه صار الكمية اللي جوا اقل من اللي تسرب.
هذا الكوستر بعد ما شفت ان ورق الزبدة ما ينفع مع الصمغ حطيت ورق الزبدة في صحن وصبيت الريزن فيه حسيت هالطريقة افضل من ورق الزبدة مع الصمغ.
هذي من القوالب الجاهزة اللي شريتها ولونتها بنفس الالوان اللي جت معها، هالعمل الغلط الوحيد اللي فيه ان الخليط بعد ما جف ما تصلب صار لين :(
وهذا بعد نتيجة القوالب اللي من جولي شيك، تقدرون تستخدمون اي قوالب سيلكون تعجبكم وراح تفي بالغرض.
______________ 🔖 ______________
وبس لهنا وصلنا لنهاية التدوينة اتمنى انها اعجبتكم وكانت خفيفة عليكم.
ولا تنسون تتابعوني بالانستقرام وتويتر على: random_fofz 🌿
